ROXAS CITY – Ang handum nga makabulig sa mga pasyente sa ospital nga nagakinahanglan sang ventilator para mabuligan sila sa ila nga pagginhawa ang mayor nga katuyuan sang grupo sang mga experto sa pagpamuno sang Capizeño nga si Dr. Abundio Balgos para maka-develop sang ReliefVent ukon kilala bilang ‘’GINHAWA’’.
Sa exclusive interview sang Bombo Radyo kay Dr. Abundio Balgos, ginpahayag sini nga ila ginsuguran ang locally made ventilator sang tuig 2011 sa Philippine General Hospital, apang nadugayan bangud wala gilayon mahatagan sang funding sang DOST.
Ginpahayag ni Balgos nga ang GINHAWA ventilator, isa ka machine nga kinahanglanon sa Intensive Care Unit sang mga ospital agud mabuligan ang mga pasyente nga may respiratory failure.
Suno kay Dr. Balgos nga matapos nangin malapnagon ang coronavirus disease 2019 ukon COVID-19 sa Pilipinas nagpakig-angut sa ila grupo ang Department of Science and Technology (DOST) agud mapadasig ang pagprodyuser sang GINHAWA ventilator kag magamit sang mga pasyente nga nabudlayan sa pagginhawa.
Sa karon may yara lamang sang mil 500 nga makabig working ventilator sa bilog nga Pilipinas sa diin ginapanan-aw nila nga posible mag-abot ang panahon nga magakinahanglan sang tres tobtob kuwatro mil ka mga ventilators sa Pilipinas.
Nahibaluan nga nagalab-ot sa P3.5 milyones ang balor sang isa ka imported ventilator samtang ang locally made GINHAWA ventilator ang nagalab-ot lamang sa P250 tobtob 300 mil ang isa.
Gintuad pa ni Dr. Balgos nga nakapatigayon na sila sang testing sa mga tawo kag sapat tatlo ka tuig na ang nakaligad kag posible isa tobtob duha ka bulan magapatigayon sila liwat sang pre-testing.
Kumpyansa ang opisyal sa ila nga produkto sang kasubong nga pulmonary specialist kag biomedical technician specialist nga naghatag sang ila ikasarang agud masabat ang kakulangan sang ventilator sa pungsod.
Samtang nag-apelar si Dr. Balgos sa publiko nga magsunod sa mga pagsulundan kasubong sa social/physical distancing kag kun mahimo magtenir sa ila mga balay agud indi maglapta ang kagaw.
Source: Bombo Radyo
